ഓർമ്മ

പിന്നിൽ നിന്ന് കുത്തി
മുന്നിൽ വന്ന് മുറിവിൽ മരുന്ന്
പുരട്ടിയവനേ..... 
നീയാണെന്റെ ശത്രുവും മിത്രവും....

മൗനത്തിന്റെ ആയിരം
രാത്രികൾ നിനക്ക് വേണ്ടി
ഞാൻ നോറ്റ നോമ്പുകളായിരുന്നു...

വരമ്പുപോൽ നീ കീറി വെച്ച
വരണ്ട ഞരമ്പുകളിലൊക്കെയും
നിന്റെ ഓർമ്മകൾ മുളയ്ക്കുന്നു
ഓരോ രാത്രിയിലും...

ഓരോ ഓർമ്മയും ഓരോ ആത്മഹത്യയാണ്.....
എന്നിൽ നിന്നും ആത്മാവ്
വേർപ്പെട്ടിട്ടും നീ മാത്രം
വേർപ്പെട്ടു പോവാത്ത ആത്മഹത്യ

അനാഥം ......

പാതിവെന്ത എന്നെ നീ ഇനിയും
എടുത്തെറിയുന്നത് എങ്ങോട്ടാണ് :::

വേനൽ കഠിനമാകുന്നു: ഒരുപക്ഷേ
നീ
നൽകിയ വിരഹത്തോളം.....

നിൻ്റെ പ്രണയച്ചൂടിൽ ആണ് ഞാന്
വിരിഞ്ഞത് ...'
ചിറകുകൾ കുരുത്തത്...

ഇപ്പോൾ പ്രണയത്തിൻ്റെ
മൂടുപടങ്ങൾ പോലും നിനക്ക് നഷ്ടമായിരിക്കുന്നു

തുടങ്ങുന്നതിനു മുമ്പേ അവസാനിച്ച
കവിത പോലെ
ഇവിടെ ഞാൻ അനാഥമാകുന്നു......

സമാന്തരം ......

നമ്മൾ വെറും സമാന്തര രേഖകൾ
ആണെന് തിരിച്ചറിയാൻ
എത്ര കാലം കൂടി വേണം നിനക്ക്                                        

അതിനിനിയും
നിറം പിടിപ്പിച്ച നുണകളായ്
എത്ര കാലം ഞാൻ ഇനിയും
നിനക്ക് മുന്നിൽ കത്തി തീരണം

ഉൾ വേവലുകളുടെ  ഓരോ
നിമിഷവും
തിരിച്ചറിവിൻ്റെ  പല്ലിവാൽ
ഞാൻ സ്വയം മുറിച്ചെറിയുന്നു

ഇനിയും നീ അറിയുന്നില്ലേ

അവസാനത്തെ വെളിച്ചവും കെട്ടുപോവുകയാണ്
മുറിഞ്ഞു വീണ വാലിൽ
നിന്നും രക്തം ഇറ്റിറ്റു വീഴുന്നു

പറയാൻ, യാത്രമൊഴി
ഞാൻ സൂക്ഷിച്ച് വെച്ചിട്ടില്ല
ഓർക്കാൻ,
നരച്ച ജീവിതത്തിൽ
നിന്ന് ഒരേടുപോലും........

ആത്മബലി ...

ഒരിക്കലും കൂടെ വരാൻ
കൂട്ടാക്കാതെ വഴിയിലെ മഴയിലെവിടെയോ
തനിച്ച് നില്ക്കുകയാണ് മനസ്സ് ..

ഓര്മകലാകട്ടെ
മഴയില കുതിർന്ന്
ചപ്പിലകൾ പോലെ
ചിതറി ക്ലാവ്  പിടിച്ചു കിടക്കുന്നു ...

ഒരു മഴനൂലിന്റെ
തുമ്പ്  എറിഞ്ഞു തരൂ ..
ഈ മഴ തീരുന്നതിനു മുമ്പേ
എനിക്ക് എന്നെ തന്നെ
ബലി അറുക്കണം ....

                   

നഷ്ടം


പരസ്പരം നഷ്ടപ്പെടുകയാണ്
നമ്മൾ ..
വാക്കുകളില്ലാതെ ..
നോട്ടങ്ങളില്ലാതെ ..
സ്പർശങ്ങളില്ലാതെ ..

അല്ലെങ്കിൽ
വാക്കുകലെന്തിനാണ് ..
നോട്ടങ്ങലെന്തിനാണ് ..
സ്പർശങ്ങലെന്തിനാണ് ..
അവ ഒന്നും നമ്മെ പരസ്പരം
പൂരിപ്പിക്കുന്നില്ലെങ്കിൽ..

തൂലിക


നിന്റെ തൂലിക നിറഞ്ഞു
ഒഴുകുന്ന ആ ചുവന്ന
ചായമില്ലേ ....
പ്രിയപെട്ടവനെ
 അതെന്റെ
രക്തമാണ് ..........

ഓർമ

നിന്റെ ഓർമ്മകളുടെ വിഷം
അകത്തു ചെന്നത് കൊണ്ടാകാം 
ഇന്ന് പകൽ മുഴുവൻ എനിക്ക് 
ചർദി ആയിരുന്നു .

ഒരു ദിവസം മുഴുവൻ 
ചർദിചിട്ടും ഓർമ്മകൾ 
ഇനിയും ഉള്ളിൽ  

പതഞ്ഞു കൊണ്ടേ ഇരിക്കുന്നു .......